Aizawl khawpui ah lirthei LMV chin chunglam bungraw phur tlan dan thar hman tan a ni

by Editor

Tualchhung News

ZORAM TODAY| 23rd July, 2024 (Tue): Stephen Lalrinawma, Sr. SP, Traffic, Aizawl chuan mipui kea kalte, lirthei hmangtute him zawk nan leh lirthei tawt lutuk tih ziaawmna turin Aizawl khawpui chhunga lirthei tam zual lai hun (peak hours] ah motor tlan dan thar hman tur thupek a chhuah a, hei hi July 22, 2024 (Thawhtan) atanga hman nghal a ni.

Thupek ah hian LMV, Pick-Up motor leh a aia lian lirthei hmangin dawr leh bazar bungrua bakah bungraw dang reng reng; kawngpui dungah Load leh Unload phal a nilo.

Load leh Unload phalloh hun hi Thawhtan atanga Inrinni chawhma dar 8:30 am - 11:00 am inkar leh chawhnu dar 3:00 pm- 6:00 pm inkar a ni. He hriattirna zawmlo te chu Section 179 MV (Amendment) Act, 2019 hmanga hrem theih an nih thu a tarlang nghal.

Hemi rual hian National Highway-6, Sairang to Zemabawk leh Zemabawk to Sairang (Aizawl By-pass road)-ah lirthei tlan dan a felfai zawk theihna tur leh mipui himna atan MMV/HMV-te tana Entry Period leh No Entry Period chu tih danglam a ni. Sairang to Zemabawk kawnga MMV leh HMV tlan theih hun chu dar 08:00 am - 08:30 am leh dar 10:30 am - 01:00 pm inkar a ni dawn a, tlan phalloh hunhi zing dar 08:30 am - 10:30 am inkar a ni ang.

Zemabawk to Sairang kawnga MMV/HMV tlan phal hun chu chawhnu dar 1:30 pm - 3:00 pm inkar leh tlai dar 6:00 pm - 7:00 pm inkar a ni ang a, tlan phal loh hun hi tlai dar 3:00 pm - 6:00 pm inkar a ni ve thung. He ruahmanna hian Pathianni (Sunday) a huam dawn lo a, a tawn tawna tlan theih hun zan dar 7:00 pm leh zing dar 8:00 am inkar a ni.